Psa 139 | MMX | STEP | Leeme Silok, ugara ila mumu avukat pam ia, kuren la uklen avukat tinotno ia.

Psalms 139

Lakleklen Axap Mi Loklok Tatao At Ne Moroa

1 Leeme Silok, ugara ila mumu avukat pam ia, kuren la uklen avukat tinotno ia. 2 Ukleklen axap mo lempanga nia ak lox i; uk lok paxalom tino, ketla ukleklen axap levendoxoma rak. 3 U reven ia at levenaleng nia a gugu xopla ak lok mamana; nenu uklen axap leveloklok tarak. 4 Keke i do a xovisi ana vaase, uraklen pam levelinga salai anaba vaase i. 5 U turu too rak at lengkot axap; la u reven aratao ia mi lolos silok taram. 6 Lakleklen taram tia i si aleng; la i volo bok lakleklen tarak.

7 Anaba sixiro ia ua basinge u? Anaba vas taba ia ua basinge levereven taram? 8 Mo do anat pas uto vana at laxalibet, nenu uk lok go; la do ana midi ro at lemenemen at labarongan, nenu uk lok go.

9 La mo do ana rava kaxat uto at lenep, laxangking i losu ve xopla anak lok to vaxalom at lenep laxangking i lotup e, 10 nenu mo ubak lok go xusu tim gomgonga ia la unaba nemen go rik lok tooro ia. 11 Mo do a epovo ri tong i ri lamain kusu na lipe ia, kopla laxasep mo ik lok kangkan ia na repukus ngan laxanimin, nenu naba epovo na ven ia. 12 Ketla lamain bok kopmen na lok ngan lamain tu, la laxanimin i kasep ngan ta laaleng kangking. Lamain eburu mi laxasep, nedu du epovo mun at levereven taram.

13 Uga rudum lengkot axap at labantuxu rak; uga vop etang ia ro xeneng at latnenat at ne naga. 14 A emi asu minu atla nenu xusuk mun limixin axap dina marat(sangu,lingun) taram; la lempanga nenu uk lox i, i lok petpes la i nunuan aleng. Akleklen tino i mi lodoxoma axap tarak. 15 At levenaleng levesi rak ga taut etang avukat tinotno ro xeneng at latnenat at ne naga; la at mo levenaleng nia aga sisilok nemnem go xeneng, nenu ugaraklen pam i do nenia mo agak lok, 16 la uga reven ia avot ti laaleng ne naga ga visik ia. Levenaleng at lorooro rak uga rivit li i ria, ugara malagan li xatling pam i at lubuk taram, avot ti mo levenaleng nat pot saparap ia.

17 O Moroa, i lolos aleng tia xusu ana xasep at leven doxoma ram; la lavanisa axap mo leven doxoma ram ik lok! 18 La amo do ana us di, diba buaang polo laxanit kangkeneng. At loxonaleng nia a rakdu tuang, nenu move uk lok buru minia. 19 O Moroa, a vara i do una sev amet luvuttadi xapmek! A vara i do luvuttadi sepsep dinaba ke xepe mulus ia! 20 Di paase leveloklok kakapmek mumu u; la di paase asu loklok bilinga rik lok kapmek laasen taram. 21 O Leeme Silok, a bele ngatngas tino rinedi mo di belengatngas tu! Ak lox abulubun tinotno nedi ua di paase pupu ru! 22 A belengatngas tinedi mi langsangan lebelemamao; a tong di do lavamunepen taram.

23 O Moroa, una ila mumu ia la unaklen lodoxoma rak; una lok tong pen ia, la unaba long terek ka leven doxoma rak. 24 Una ila mumu ia do teveloklok kakapmek tarak, la unam gomgonga amisik ia at levenaleng axap se at lanmet tarak.